अकोला जिल्हाधिकारी कार्यालय उडविण्याची ई-मेलद्वारे धमकी; कडेकोट पोलिस बंदोबस्त
अकोला — अकोला जिल्हाधिकारी कार्यालय उडवून देण्याची थेट धमकी देणारा ई-मेल पोलिस यंत्रणेला प्राप्त झाल्याने एकच खळबळ उडाली असून शहराच्या सुरक्षेचा प्रश्न ऐरणीवर आला आहे. धमकीची माहिती मिळताच प्रशासन तत्काळ सतर्क झाले आणि जिल्हाधिकारी कार्यालय परिसरात कडेकोट पोलिस बंदोबस्त तैनात करण्यात आला.
पोलिस विभागाच्या अधिकृत यंत्रणेला हा धमकीचा ई-मेल प्राप्त झाल्याची माहिती सूत्रांकडून मिळाली आहे. प्राथमिक माहितीनुसार, ई-मेलमधील मजकूर अत्यंत गंभीर स्वरूपाचा असून जिल्हाधिकारी कार्यालयाला लक्ष्य केल्याचे त्यात नमूद करण्यात आल्याची चर्चा आहे. या पार्श्वभूमीवर पोलिस प्रशासन, बॉम्ब शोधक व नाशक पथक (BDDS) आणि गुप्तचर यंत्रणा सतर्क झाली आहे.
धमकीनंतर जिल्हाधिकारी कार्यालय परिसरात ये-जा करणाऱ्या नागरिकांची कसून तपासणी सुरू करण्यात आली आहे. प्रवेशद्वारांवर अतिरिक्त पोलिस तैनात करण्यात आले असून वाहनांचीही झडती घेतली जात आहे. संशयास्पद हालचालींवर बारकाईने लक्ष ठेवले जात असून अधिकारी व कर्मचाऱ्यांनाही सतर्क राहण्याच्या सूचना देण्यात आल्या आहेत.
दरम्यान, हा धमकीचा ई-मेल कुठून पाठवण्यात आला, त्यामागचा उद्देश काय आणि संबंधित व्यक्ती किंवा गट कोण आहे, याचा शोध घेण्यासाठी सायबर पोलिसांकडून तांत्रिक तपास सुरू आहे. ई-मेलचा आयपी अॅड्रेस व अन्य डिजिटल ठसे तपासले जात असून हा खोडसाळपणा आहे की प्रत्यक्ष धोका, याचा सखोल तपास केला जात आहे.
या घटनेमुळे अकोला शहरात काही काळ तणावाचे वातावरण निर्माण झाले होते. मात्र परिस्थिती नियंत्रणात असल्याचे पोलिस प्रशासनाने स्पष्ट करत नागरिकांनी अफवांवर विश्वास न ठेवता प्रशासनाला सहकार्य करावे, असे आवाहन केले आहे. जिल्हाधिकारी कार्यालयासारख्या महत्त्वाच्या शासकीय ठिकाणी धमकी मिळाल्याने पुढील काही दिवस सुरक्षा व्यवस्था अधिक कडक ठेवण्यात येणार असल्याची माहिती पोलिस सूत्रांनी दिली आहे.